موال زهره الاخلاص
كلمات الاغنيه
يا عينى دارى البكاء .. يا مركبى بلدى
لو بينا طال اللقا .. وبعدنا يا بلدى
حاخلع هدوم الشقا .. والبس هدوم بلدى
يا اللى انتى بينك وبينى نظرتين بصى
طاير بقلب الطير داير على خصى
نصى رماه الشبك والباقى مش نصى
مالت شواشى الشجر تزرع نوى تمرى
انا قلت يا هل ترى امرك مهوش امرى
عمر النخيل الصبى ميكفيهوش عمرى
وكلام ليالى السفر غير الكلام كله
دافى لكنه مطر عمرى مباغله
حتى الشجر لو شجر
ما حينتنيش ضله
مكتوب اعيش السفر والعشق والترحال
تسقط شهور السنه ورقه وراء موال
اقطف حياتى نغم وامشى كما الرحال
والعمر يجرى وانا حاضن كراريسى
تعلا رياح الزمن تطفى فوانيسى
واللى افتكر يفتكر ما دمت انا ناسى
ناسى الدفا والدار .. الريحه والانفاس
ناسى فى قلبى حوارى وف عنيا ناس
ببكى سما شارده يا زهره الاخلاص
--------------------------------------------
كلمات اشرف عامر
الحان فاروق الشرنوبى
0 التعليقات:
إرسال تعليق